समखबर संबाददाता 
समखबर संबाददाता
काठमाडौं, पुष, १५ । नेपाली कांग्रेस परित्याग गरेका खगेन्द्र कर्ण राष्ट्रिय स्वतन्त्र पार्टी (रास्वपा) को समानुपातिक तर्फको उम्मेदवार सूचीमा पुरुषतर्फ दोस्रो स्थानमा परेका छन्। रास्वपाले निर्वाचन आयोगमा पेश गरेको ११० जनाको समानुपातिक बन्द सूचीमा कर्णको नाम मधेसी क्लष्टरअन्तर्गत समावेश गरिएको छ।
कांग्रेसबाट लामो समय राजनीति गरेका कर्णले युवाहरूको मूल्यांकन नहुने र अवसर नपाइने वातावरणका कारण फरक राजनीतिक बाटो रोजेको बताएका छन्। उनले पार्टी परित्यागपछि दिएको प्रतिक्रिया उल्लेख गर्दै भने, “कांग्रेसमा युवाको योगदान र क्षमतालाई उचित स्थान नदिइने अवस्था देखेपछि नयाँ राजनीतिक विकल्पतर्फ अघि बढ्ने निर्णय गरेँ।”
रास्वपामा प्रवेशसँगै कर्णले वैकल्पिक राजनीतिक धारलाई मजबुत बनाउने र समावेशी तथा उत्तरदायी राजनीतिका लागि काम गर्ने प्रतिबद्धता जनाएका छन्। पार्टी नेतृत्वले पनि मधेसी क्लष्टरबाट कर्णलाई अग्रस्थानमा राख्नु समावेशीताको सन्देश भएको बताएको छ।
राजनीतिक विश्लेषकहरूका अनुसार परम्परागत दल परित्याग गरी नयाँ दलतर्फ आकर्षित हुने प्रवृत्ति पछिल्लो समय बढ्दो छ। कर्णको रास्वपामा प्रवेश र समानुपातिक सूचीमा अग्रस्थानले पार्टीको संगठन विस्तार र मधेसी समुदायमा प्रभाव बढाउने अपेक्षा गरिएको छ।
रास्वपाले पेश गरेको ११० जनाको समानुपातिक सूचीमा विभिन्न समुदाय, क्षेत्र र पेशागत पृष्ठभूमिका व्यक्तिहरूलाई समेटिएको जनाएको छ। खगेन्द्र कर्णको समावेशीकरणलाई आगामी निर्वाचनमा पार्टीको रणनीतिक कदमका रूपमा हेरिएको छ।
समखबर संबाददाता 
