समखबर संबाददाता 
समखबर संबाददाता
सर्लाही । नेपाली कांग्रेसका नेता गगन थापाले सर्लाही–४ मा आयोजित कार्यक्रममा स्थानीय समुदायप्रति सम्मान देखाउने विषयमा स्पष्ट सन्देश दिएका छन्। उनले स्थानीय भाषा र संस्कृतिलाई सतही रूपमा प्रयोग गरेर नाटक गर्ने प्रवृत्तिको आलोचना गर्दै वास्तविक सम्मान व्यवहार र कामबाट देखिनुपर्ने बताएका छन्।
थापाले भने, “दुई लाइन रटेर स्थानीय भाषाको नाटक गर्नु मेरो शैली होइन। यहाँका नागरिकलाई झुक्याउने होइन, उनीहरूको समस्या बुझेर समाधानतर्फ जानु नै साँचो सम्मान हो।” उनले राजनीतिको नाममा देखावटी र भावनात्मक अभिनयभन्दा इमानदार संवाद र दीर्घकालीन काम आवश्यक रहेकोमा जोड दिए।
उनका अनुसार प्रतिनिधि बन्नेहरूले स्थानीय समुदायसँग आत्मीय सम्बन्ध बनाउनुपर्छ, जुन भाषिक नाटक वा चुनावी भाषणले होइन, निरन्तर उपस्थिती र उत्तरदायित्वबाट सम्भव हुन्छ। उनले विकास, शिक्षा, स्वास्थ्य र रोजगारीजस्ता मुद्दामा स्पष्ट योजना र परिणाममुखी काम गर्नुपर्ने धारणा राखे।
कार्यक्रममा सहभागी स्थानीय बासिन्दाले पनि नेताहरूले भाषणभन्दा काममा ध्यान दिनुपर्ने अपेक्षा व्यक्त गरेका थिए। गगन थापाको उक्त अभिव्यक्तिलाई सर्लाही–४ मा राजनीतिक संस्कार र व्यवहारबारे दिएको सन्देशका रूपमा हेरिएको छ।
समखबर संबाददाता 
