समखबर संबाददाता 
समखबर संबाददाता
काठमाडौं, ४ फागुन । नेपाली कांग्रेसका सभापति गगनकुमार थापाले नेपाललाई आगामी पाँच वर्षभित्र डिजिटल हब बनाउन सक्ने गरी रोडम्याप सार्वजनिक गरेका छन्। सोमबार बिहान सामाजिक सञ्जाल फेसबुकमार्फत एक भिडियो सन्देश जारी गर्दै उनले सूचना प्रविधिको क्षेत्रमा थोरै सुधार गर्दा पनि ठुलो नतिजा ल्याउन सकिने विश्वास व्यक्त गरे।
उनले भने, ‘हामी गर्ने भनेर दत्तचित्त भएर लागेमा पाँच वर्षभित्र साँच्चिकै गर्न सक्छौँ प्रविधिको क्षेत्रमा। पाँच वर्षभित्र करिब चार खर्ब रुपैयाँको आइटी सेवा विदेशमा निर्यात गर्न सकिन्छ । दुई लाखभन्दा बढी प्रत्यक्ष रोजगारी सिर्जना गर्न सकिन्छ।’
केही समयअघि कीर्तिपुरको एक सभामा ल्यापटप चलाएरै मासिक तीन–चार लाख कमाउन सकिन्छ भनी दिएको अभिव्यक्ति ट्रोलको विषय बने पनि त्यो हावादारी कुरा नभई योजनाबद्ध सोच रहेको उनले स्पष्ट पारे । अघिल्लो सरकारको पालामा अध्यादेशमार्फत गरिएका साना सुधारले पनि सकारात्मक नतिजा देखाएको उदाहरण दिँदै उनले अब थप व्यवस्थित र नीतिगत सुधारको खाँचो रहेको औँल्याए।
थापाले सन् २०२४ देखि २०३४ सम्मको अवधिलाई ‘आइटी दशक’ का रूपमा अघि बढाउने लक्ष्य राख्दै पाँच वर्षभित्रै करिब चार खर्ब रुपैयाँबराबरको आइटी सेवा निर्यात गर्न सकिने दाबी गरे । उनको योजनामा दुई लाखभन्दा बढी प्रत्यक्ष रोजगारी सिर्जना गर्ने, कम्तीमा दुई सय नेपाली आइटी कम्पनीलाई विश्वबजारमा विस्तार गर्ने र तीनदेखि पाँचवटा कम्पनीलाई धितोपत्र बजारमा सूचीकृत गर्ने लक्ष्य समावेश छ ।
उनले भने, ‘दुई लाखभन्दा बढी प्रत्यक्ष रोजगारी सिर्जना गर्ने, कम्तीमा दुई सय नेपाली आइटी कम्पनीलाई विश्वबजारमा विस्तार गर्ने र तीनदेखि पाँचवटा कम्पनीलाई धितोपत्र बजारमा सूचीकृत गर्न सकिन्छ।’
यसका लागि उनले स्थिर कर नीति, सूचना प्रविधिमा दक्ष जनशक्ति उत्पादनका लागि ‘ट्यालेन्ट हब’ निर्माण, सार्वजनिक तथा निजी साझेदारीको मोडल अघि सारेका छन्। अब नेपाल फ्रिल्यान्सिङ र बिपिओमा मात्र सीमित नभई आफ्नै डिजिटल उत्पादन निर्माण र निर्यातमा केन्द्रित हुनुपर्ने उनको भनाइ छ । सरकारले पनि स्वदेशी प्रविधि र उत्पादनलाई प्राथमिकताका साथ प्रयोग गर्नुपर्नेमा उनले जोड दिए ।
सभापति थापाले भने, ‘आइसिटीको क्षेत्रमा रहेको करको दायरलाई स्थिर बनाउनुका साथै केही कानुनी अड्चनहरू हटाउनु जरुरी छ। यसले गर्दा आइसिटी सेक्टरले केही वर्षभित्रै व्यापक सुधार ल्याउन सक्छ।’
समखबर संबाददाता 
