समखबर संबाददाता 
समखबर संबाददाता
काठमाडौं, पुष, १८ । नेपाली कांग्रेसका विशेष महाधिवेशन पक्षधर नेताहरूले पार्टीसँग अब विशेष महाधिवेशनको विकल्प नरहेको बताएका छन् । उनीहरूले पार्टीभित्र देखिएको राजनीतिक अन्योल र संगठनात्मक समस्याको निकास विशेष महाधिवेशनबाट मात्रै सम्भव हुने दाबी गरेका हुन्।
शुक्रबार काठमाडौंको अनामनगरमा आयोजित पत्रकार सम्मेलनमा बोल्दै विशेष महाधिवेशन पक्षधर नेताहरूले विधानअनुसार विशेष महाधिवेशन वैधानिक अधिकार भएको र यसलाई रोक्न नमिल्ने बताएका छन् । उनीहरूले पार्टीलाई एकताबद्ध र सुदृढ बनाउन समयमै विशेष महाधिवेशन आवश्यक रहेको धारणा राखे।
नेता सुवास पोखरेलले पार्टीको वर्तमान अवस्थाले नियमित प्रक्रियाबाट समाधान नदिने स्पष्ट संकेत गरेको भन्दै विशेष महाधिवेशन अपरिहार्य भएको बताए । उनले भने, “विशेष महाधिवेशनबाहेक अहिले कांग्रेससँग अन्य कुनै विकल्प छैन । यो पार्टी विधानले दिएको वैधानिक अधिकार हो, यसलाई विवादको विषय बनाउन आवश्यक छैन।”
पत्रकार सम्मेलनमा नेताहरूले विशेष महाधिवेशन पार्टी विभाजनका लागि नभई पार्टीलाई थप बलियो बनाउने माध्यम भएको स्पष्ट पारे । उनीहरूले नेतृत्व चयन, संगठन सुदृढीकरण र कार्यदिशा स्पष्ट गर्न विशेष महाधिवेशन आवश्यक रहेको बताए।
विशेष महाधिवेशनको विषयलाई लिएर पार्टीभित्र मतभेद देखिए पनि संवाद र सहमतिबाट अघि बढ्नुपर्ने उनीहरूको जोड थियो । साथै, विशेष महाधिवेशनलाई लिएर फैलाइएका भ्रम र आशंकालाई चिर्न नेतृत्व जिम्मेवार बन्नुपर्ने पनि उनीहरूले बताए।
पार्टीभित्र विशेष महाधिवेशनको मिति घोषणा भएपछि विवाद चर्किँदै गएको छ । एकातर्फ सभापति शेरबहादुर देउवा पार्टी विभाजनको विपक्षमा रहेको बताइरहेका छन् भने अर्कोतर्फ विशेष महाधिवेशन पक्षधर नेताहरू यसलाई समयको आवश्यकता भन्दै अघि बढ्न दबाब दिइरहेका छन्।
समखबर संबाददाता 
